“Future Hospitality Forum”: Investimet dhe standardet e mikpritjes në qendër të zhvillimit të turizmit shqiptar

Investimet në turizëm, përmirësimi i standardeve të shërbimit dhe zhvillimi i kapitalit njerëzor ishin në qendër të mesazheve të Forumit “Future Hospitality”, organizuar nga Agjencia Shqiptare për Zhvillimin e Investimeve (AIDA).

Me pjesëmarrjen e investitorëve dhe përfaqësuesve të markave ndërkombëtare të hotelerisë, forumi vuri në vëmendje potencialin e Shqipërisë për zhvillimin e sektorit të mikpritjes, në një periudhë kur interesi ndërkombëtar dhe zgjerimi i ofertës turistike po rrisin edhe pritshmëritë për cilësinë.

Prania në tregun shqiptar e markave si Marriott, Hilton, Radisson Hotel Group, Meliá Hotels dhe Maritim dëshmon diversifikimin e sektorit dhe interesin për investime. Krahas zgjerimit të kapaciteteve akomoduese, rëndësi merr përgatitja e stafit, profesionalizimi i shërbimeve dhe krijimi i vendeve të punës me kualifikim të lartë.

Në fjalën e tij, ministri i Turizmit, Kulturës dhe Sportit, Blendi Gonxhja, theksoi se zhvillimi duhet të matet edhe përmes përvojës së vizitorëve, kohëzgjatjes së qëndrimit dhe vlerës që turizmi krijon për ekonominë vendase. “Një destinacion nuk mund të zhvillohet në mënyrë të qëndrueshme nëse kërkesa rritet më shpejt se cilësia”, u shpreh ai.

Sipas shifrave të prezantuara nga ministri, në korrik të këtij viti numri i vizitorëve të akomoduar në strukturat turistike u rrit me 15,2% krahasuar me të njëjtën periudhë të vitit të kaluar, ndërsa numri i vizitorëve jorezidentë u rrit me 18,3%.

Ky forum sjell në vëmendje rëndësinë e një zhvillimi të qëndrueshëm të turizmit shqiptar, ku zgjerimi i investimeve të ecë paralelisht me përmirësimin e standardeve dhe kualifikimin e fuqisë punëtore. Në këtë perspektivë, cilësia e mikpritjes dhe vlera e krijuar për ekonominë vendase mbeten përcaktuese për forcimin e konkurrueshmërisë së Shqipërisë si destinacion turistik.

TravelBiz.al