Kumbaro-Tomašević, projekte të përbashkëta për promovim turistik të Tiranës dhe Zagrebit

Ministrja e Turizmit dhe Mjedisit, Mirela Kumbaro priti në një takim kryetarin e Bashkisë së Zagrebit, Tomislav Tomašević, me të cilin bisedoi mbi menaxhimin e mbetjeve dhe turizmin.

Kumbaro tha se, “të shumta janë pikëtakimet në lidhje me mjedisin dhe menaxhimin e mbetjeve, ku Tomašević ka një eksperiencë të vyer dhe është krejtësisht i fokusuar në ekonominë qarkulluese, pikërisht për të cilën që nga janari i këtij viti kemi krijuar një drejtori të posaçme në Ministrinë e Turizmit dhe Mjedisit”.

“Shumë mundësi kemi edhe për të bashkëpunuar në turizëm dhe promovimin e Tiranës dhe Zagrebit. 50% më shumë vizitorë kroatë kishim në vitin 2022 krahasuar me vitin paraardhës, shifra që na tregojnë se jemi në vijë të mbarë”, theksoi Kumbaro.